पर्यटन उद्योगलाई पुनर्जीवन दिन कार्यदल गठन

काठमाडौं। कोभिड १९ महामारीका कारण नराम्ररी थलिएको मुलुकको पर्यटन उद्योगलाई पुनर्जीवन दिन नेपाल पर्यटन बोर्डले ‘टुरिजम रिभाइभल टास्कफोर्स’ गठन गरी कार्य प्रारम्भ गरेको बताएको छ ।
सरकारको प्राथमिकता तथा निजी क्षेत्रको चाहना एवं बाध्यताका बीचमा थप समन्वय र सहकार्यको खाँचो देखिएकाले बोर्डले पर्यटनको सर्भाइभल र रिभाइभल को योजना अगाडि ल्याएको छ ।

प्यासिफिक एशिया ट्राभल एशोसिएशन पाटा लगायत पर्यटन क्षेत्रका प्रतिष्ठित सङ्घ संस्था एवं अग्रजपर्यटन व्यवसायी समेतलाई सल्लाहकारको रुपमा समेटी बोर्डका कार्यकारी प्रमुखको संरक्षकत्वमा कार्यदल बनाइएको बोर्डले जनाएको छ ।

महामारीका कारण थलिएको पर्यटन उद्योगलाई पुनर्जीवन दिन समग्र पर्यटन क्षेत्रका संस्था तथा अगुवा व्यवसायिलाई एउटै छातामुनि ल्याएर पुनःरुत्थानको कामलाई प्रभावकारी बनाउने उद्देश्यले कार्यदल बनाइएको बोर्डका कार्यकारी प्रमुख डा। धनञ्जय रेग्मीले बताए।

उनका अनुसार पर्यटन पुनःरुत्थानका लागि बोर्डले केही अगुवा पर्यटकीय संस्थाको प्रतिनिधित्व रहने गरी बृहत् कार्यदल बनाइएको हो।