निषेधाज्ञामा ३० प्रतिशतले ग्यास खपतमा कमी आयो

काठमाडौं । कोरोना भाईरस नियन्त्रण तथा रोकथामका लागि लगाईएको लकडाउन तथा निषेधाज्ञाले खाना पकाउने एलपी ग्यासको खपत ३० प्रतिशतले घटेको छ । मुलुकभर ग्यासको खपत २५ देखि ३० प्रतिशतले घटेको नेपाल एलपी ग्यास उद्योग संघका पूर्वअध्यक्ष शिवप्रसाद घिमिरेले जानकारी दिए ।

सामान्य अवस्थामा मासिक ४० देखि ४५ हजार टन ग्यास आयात हुने गरेकोमा अहिले ३५ देखि ३७ हजार टन ग्यासको आयात भएको छ । उपत्यकामा मात्रै दैनिक ४० हजार ग्यास खपत हुनेमा अहिले २० हजारभन्दा कम खपत व्यवसायीको भनाइ छ । सामान्य अवस्थामा ७० प्रतिशत औद्यौगिक प्रयोजन र ३० प्रतिशत ग्यास घरायसी प्रयोजनका लागि खपत हुने गरेको छ ।

हाल उद्योगसँग १५ हजार टन ग्यास स्टोर रहेको छ । नेपालभर ५८ वटा उद्योग छन् । ती उद्योगहरूले एक सय टनदेखि एक हजार टनसम्म क्षमता रहेको छ । निजी उद्योगसँग ६ हजार टन ग्यास भन्डारण गर्ने क्षमता रहेको छ । ग्यासको बजार मूल्य एक हजार ३ सय ७५ रुपैयाँ रहेको छ ।