रसायन मिश्रीत स्यानिटाइजर उत्पादन गर्ने सीता हर्बललाई कारबाही

काठमाडौं । सरकारले तोकेको मापदण्ड पूरा नगरी स्यानिटाइजरको उत्पादन र बिक्री गर्ने उद्योग कारवाहीमा परेको छ । औषधि व्यवस्था विभागको विराटनगरस्थित प्रादेशिक कार्यालयले सुनसरीको नरसिंह गाउँपालिका ४ स्थित सीता हर्बल केमिकल उद्योगलाई कारबाही गरेको हो ।

सीता हर्बल केमिकल उद्योगले गत वैशाख महिनादेखि ‘क्लिन ह्यान्ड’ ब्रान्डमा स्यानिटाइजर गर्दै आएकोमा हानिकारक बस्तु मिश्रण गरेपछि उद्योग बन्द गर्न निर्देशन दिएको हो ।

उद्योगले मापदण्डविपरीत ‘मिथानोल स्पिरिट’ हालेर स्यानिटाइजर उत्पादन गरेको पाइएको कार्यालयका फार्मेसी निरीक्षक दीपेन्द्र खड्काले जानकारी दिए ।

कार्यालयले जफत गरेको स्यानिटाइजर थप परीक्षणका लागि राष्ट्रिय औषधि प्रयोगशालामा पनि पठाएको बताएको छ । त्यहाँबाट रिपोर्ट भने आइसकेको छैन ।