सरकारको निर्माण कम्पनीलाई डण्डा, २१ ठेक्का रद्द र १८ कम्पनी कालोसूचीमा

काठमाडौं । सडक डिभिजन कार्यालय हेटौँडाले २१ ठेक्का रद्द र १८ निर्माण कम्पनीलाई कालोसूचीमा राखेको छ । सम्झौताअनुसार तोकिएको र थपिएको समयमा समेत काम सम्पन्न नगरेको भन्दै विभिन्न निर्माण कम्पनीसँग भएका २१ ठेक्का सम्झौता रद्द र १८ निर्माण कम्पनीलाई कालोसूचीमा राख्ने तयारी थालेको हो ।

सडक डिभिजन कार्यालयका अनुसार पटक–पटक म्याद थप गरेर पनि लामो अवधिसम्म कार्य सम्पन्न नगर्ने निर्माण कम्पनीसँगको ठेक्का सम्झौता तोड्ने निर्णय गरेको हो । सडक डिभिजन कार्यालयले सर्तनामाबमोजिम काम गर्न ठेक्का सम्झौता गरेका १७ निर्माण कम्पनीसँगको ठेक्का अन्त्य गरिएको सूचना बुधबार प्रकाशित गरेको हो ।

सार्वजनिक खरिद ऐन २०६३ बमोजिम बैंक जमानत जफत गरी बाँकी कामको रकम सरकारी बाँकी सरह असुलउपर गर्ने र निर्माण कम्पनीलाई कालोसूचीमा राख्ने प्रक्रिया अघि बढाएको हो । डिभिजन कार्यालयले मकवानपुरका ७, पर्साका ६, बाराका ३ र काठमाडौँको १ निर्माण कम्पनीसँगको सम्झौता रद्द गरेको सूचना प्रकाशन गरेर जनाएको छ ।