राष्ट्रिय झण्डा जलाएको आरोपमा ग्याल्जोम दोर्जे तामाङसहित ९ जना पक्राउ

काठमाडौँ – म्युजिक भिडियोमा राष्ट्रिय झन्डा जलाएको आरोपमा प्रहरीले ९ जनालाई पक्राउ गरेको छ । राष्ट्रिय झण्डा जलाउने घटनाका मुख्य आरोपी ग्याल्जोम दोर्जे तामाङसहित हालसम्म ९ जना पक्राउ परेका हुन् ।

जातीय हिंसा भड्काउन बल पुर्‍याउने र राष्ट्रिय झण्डा जलाएको भिडियो सार्वजनिक भएपछि सामाजिक सञ्जालमा चर्को आलोचना भएको थियो ।

प्रहरीका अनुसार राष्ट्रिय झण्डा जलाउनेमध्ये ९ जनालाई पक्राउ गरिएको र थप केहीको पहिचान भइसकेको छ ।

गत भदौ १ गते अपलोड गरिएको भिडियो अहिले पनि युट्युबमा उपलब्ध छ । यो समाचार तयार पार्दासम्म भिडियोलाई झण्डै ६ लाखले हेरेका छन् भने २५ हजारभन्दा बढीले प्रतिक्रिया जनाएका छन् ।

पक्राउ परेकालाई अपराध महाशाखा टेकुमा राखेर अनुसन्धान भइरहेको बताइएको छ ।

उक्त म्युजिक भिडियोको करीब ४० सेकेन्डदेखि नेपालको राष्ट्रिय झण्डा जलाएको दृश्य छ । भिडियो मकवानपुरको वागमती गाउँपालिका–३ स्थित सल्लेनीको विष्णु आधारभूत विद्यालयमा खिचिएको छ ।

म्युजिक भिडियोमा साम्प्रदायिकता माथि नै खलल पुग्ने किसिमका भनाइहरू भएका कारण सामाजिक सञ्जालमा चर्को आलोचना भइरहेको छ ।